90 տարին` իմաստության չափանիշ

Պատկերացնու՞մ եք, թե ինչպիսի ափսոսանք ու հիասթափություն կապրեր հանրապետության ողջ բժշկական հասարակայնությունը, հատկապես Մխիթար Հերացու անվան պետական բժշկական համալսարանի ողջ կոլեկտիվն ու ուսանողությունը.., եթե բժիշկ-պատմաբանների համառ ջանքերով ժամանակին չհնչեցվեր անցյալի էջերում մոռացության մատնված` 2010 թվականին մոտեցող բժշկական մայր կրթօջախի 90-ամյա հոբելյանի ժամանակացույցի տրամաբանական ահազանգը: 

Ռեկտոր Գ.Քյալյանի կողմից ԵՊԲՀ-ի 2009թ. գործունեության և 2010թ. նախահաշվի հետ հոգաբարձուների խորհրդին էր ներկայացվել մոտեցող հոբելյանը պատշաճ ձևով նշելու հիմնականում մեծածավալ, նշանակալից և իրենց նախադեպը չունեցող շուրջ երկու տասնյակ միջոցառումների մարաթոնային ծրագիրը, որի կիզակետն ամփոփվեց 5-օրյա շռնդալի հանդիսությունների շրջանակներում, ընդգրկելով հանրապետության կառավարությունից մինչև հանրապետական գիտաուսումնական բոլոր կառույցների ու արտասահմանյան բազմաթիվ երկրների բժշկագիտական նշանավոր կենտրոնների պատվիրակների մասնակցությունը: 

Դժվար է հիշատակել երբեմնի այսպիսի լայնածավալ ավելի քան մեկտարյա և դեռ շարունակվող միջոցառումների մի հսկա շղթա հանրապետության բուհերի կյանքում, որն սկսվեր մի ամբողջ շարք տարաբնույթ, մասնագիտական միջազգային գիտաժողովներից, ընդգրկեր նորաստեղծ բժշկական ախտորոշիչ ուսումնական կենտրոնների ու ժամանակակից հագեցվածությամբ համալսարանական կլինիկաների հիմնման, ուսումնական հենակետային կենտրոնների տեխնիկական վերակառուցման, վերազինման աշխատանքներից մինչև արտասահմանյան գիտաբժշկական նշանավոր կենտրոնների հետ գիտական, դասախոսական կադրերի մասնագիտացման ու կատարելագործման խնդիրների համատեղ լուծման ակտիվ գործընթացների զարգացումը: 

Չմոռանանք նաև հոբելյանը նշանավորող բացառիկ սխրանքը` ԵՊԲՀ պրոռեկտոր Սամվել Բարոյանի նախաձեռնությամբ Արարատի գագաթին ՀՀ պետական և ԵՊԲՀ 90-ամյակի հոբելյանական դրոշների ծածանվելը և բիբլիական սարի գագաթից ձյունախառն քամու սուրոցին ներդաշնակ հեռախոսազանգով շնորհավորանքը:

ԵՊԲՀ գիտական խորհրդի հոբելյանական նիստը սկսվեց օրհներգի կատարումով: ԵՊԲՀ առաջընթացի գործում ցուցաբերած բացառիկ ծառայությունների համար մասնակիցներից ՀՀ կառավարության, ԱԺ ղեկավար և արտերկրների նշանավոր գիտական ուսումնական հաստատությունների մի խումբ ներկայացուցիչներ պարգևատրվեցին համալսարանի առաջին և երկրորդ կարգի շքանշաններով, նաև` 90-ամյակի հոբելյանական ոսկե կրծքանշանով: 

Կրթության և գիտության նախարարը նշելով ԵՊԲՀ-ի առաջատար դերը բուհական համակարգում` 25 դասախոսների, գիտնականների և աշխատակիցների պարգևատրեց նախարարության ոսկե մեդալներով, պատվոգրերով և շնորհակալագրերով:

Ողջույնի խոսքով հանդես եկան և հուշանվերներ հանձնեցին արտերկրներից ժամանած հյուրեր և հանրապետության տարբեր բուհերի տնօրեններ, իսկ ՊՀ ռեկտոր` ՀՀ բուհերի ռեկտորների խորհրդի նախագահ Ա.Սիմոնյանը, նշելով Գ.Քյալյանի ակտիվ դերը ռեկտորների խորհրդում, նրան պարգևատրեց ՊՀ-ի «Ոսկե մեդալով»: 

90-ամյա հոբելյանի 5 օր շարունակվող հանդիսությունների վերջակետը, որը համընկավ քաղաքում «Էրեբունի-Երևան» 2792-ամյակի տոնակատարությանը, դրվեց Պետօպերայի դահլիճում և Ն.Ս.Օ.Տ.Տ. Ամենայն Հայոց Կաթողիկոս Գարեգին երկրորդի օրհնանքի և շնորհավորանքի խոսքով: ՀՀ վարչապետ Տ.Սարգսյանը նախագահի անունից գիտության վաստակավոր գործչի պատվավոր կոչման հավաստագիր հանձնեց ԵՊԲՀ պրոռեկտոր Վ.Շեկոյանին և «Մխիթար Հերացի» մեդալ` վիրաբուժության N1 ամբիոնի վարիչ Մ.Միրիջանյանին: Նա վարչապետի հուշամեդալով (3) և շնորհակալագրերով (8) պարգևատրեց երկար տարիներ համալսարանի կյանքում նշանակալից ներդրում իրականացնող աշխատակիցների:

Փակման արարողության  ավարտական ակորդը բժշկական մայր-օջախի կազմավորման ու հետագա տարիների ոչ սովորական պատմավավերագրական հեռուստատեսային նկարի ցուցադրումն էր:

Չկտրվելով աշխատատեղերից, ԵՊԲՀ ստորաբաժանումների մի խումբ աշխատողներ երկարամյա, բարեխիղճ, անբասիր աշխատանքի համար խրախուսվեցին հոբելյանական մեդալներով, պատվոգրերով և շնորհակալագրերով:

Հոբելյանական տոնակատարությունների ալիքը տարածվեց աշխարհի տարբեր երկրներում ներկայումս գործող երևանյան մայր-բուհի նախկին սաների շրջանում: Դրանցից անմասն չմնաց ՌԴ-ում գործող ԵՊԲՀ շրջանավարտների մոսկովյան միությունը, որը ՙԲորոդինո՚ հյուրանոցային համալիրում պատշաճ հանդիսավորությամբ նշեց մայր-բուհի 90-ամյակը: Հանդիսավոր նիստին մասնակցում էին ՌԴ-ում Հայաստանի դեսպան Օ.Եսայանը, դեսպանատան աշխատողները, Ռուսաստանի հայերի միության ներկայացուցիչներ:

Այս մարաթոնային հոբելյանական 5-օրյակից ստացած տպավորությունները երկար կմնան հանրապետության համալսարանական կյանքի հուշագրքում:

«Առողջապահություն» հանդեսի խմբագրությունը միացնում է իր ձայնը Հայաստանի բժշկագիտության մայր-տաճարին` իր համահրատարակչին ուղղված բազմաթիվ շնորհավորականներին, և ցանկանում հարյուրամյակների երկարակեցություն` ի պատիվ և ի բարօրություն համայն հայության:

Հարցեր, պատասխաններ, մեկնաբանություններ